Паэт, перакладчык. Скончыў філалагічны факультэт БДУ па спецыяльнасці “Беларуская і ўкраінская філалогія”. Працягвае навучанне ў магістратуры на кафедры тэорыі літаратуры. Працуе настаўнікам беларускай мовы і літаратуры ў СШ №135 г. Мінска і выкладчыкам украінскай мовы і літаратуры ў Цэнтры славянскіх моў і культур. Любіць паэзію ўкраінскіх шасцідзясятнікаў, а таксама ўсё, што звязана з літаратурай і творчасцю.
Прадстаўленыя вершы – падборка перакладаў з кнігі паэзіі львоўскага паэта Уладзіміра Калікі “Пераплыву Дунай”. “Камп’ютарны эпас” – так ахарактарызаваў творца свой зборнік. У гэтым вызначэнні спалучаюцца дзве эпохі – сённяшняя і мінулая. Але цяпершчына ў Калікі – час крызісаў, няпэўнасці і разгубленасці. Менавіта таму лірычны герой вяртаецца ў мінулае, чэрпае сілы з фальклору і міфалогіі. Там ён сустракае “фальклорнага казака Мамая”, які славіўся сваёй дабрачыннасцю настолькі, што ў ХVІ ст. ва Украіне яго партрэты пісалі па пэўным каноне. Казак Мамай жыве за Дунаем – сімвалам еднасці славян. Гэты міфалагічны герой дасылае сучаснікам “эсэмэскі”, праводзіць з імі віртуальныя канферэнцыі. Мамай у кнізе – сімвал народнай мудрасці, якая страчана сучаснымі пакаленнямі. Каб атрымаць гэтыя веды, трэба “пераплысці Дунай”. Але зрабіць заплыў не проста, бо гэта пад сілу толькі чыстаму і шчыраму чалавеку.
У. Каліку хвалюе лёс роднай яму Украіны і захаванне традыцый, будучыня ўкраінцаў, іх адзінства і гістарычны шлях, экалогія і падзенне нораваў, сапраўднасць чалавечых адносінаў і праблема выбару паміж рэальнасцю і вымыслам. Адным словам, “эпас” вельмі карысны тым, хто хацеў бы “на себе подивиться збоку”. Зборнік вершаў У. Калікі “Пераплыву Дунай” намінаваны на атрыманне Дзяржаўнай прэміі Украіны. Чакаецца і хуткае выданне яго па-беларуску.
Каліка, В. П. Перепливу Дунай : комп’ютерний епос / В. П. Каліка ; пер. сл. Тараса Салиги ; післясл. Левка Різника. – Львів : СПОЛОМ, 2012. – 368 с.