Дзённік праходжання фальклорнай практыкі ў лабараторыi

Малгажата Авярчук, студэнтка 1-га курса (2008) спецыяльнасцi "беларуская фiлалогiя"

30. 06. 2008 г.
Першы дзень у архіве... Жах! Вочы лезуць на лоб ад такой колькасці папак з творамі! Ой, не ведаю, колькі тут працягну...

01. 07. 2008 г.
Лета, сонейка... а ты сядзіш тут, дыхаеш пылам, складаеш паперы... Нібы і канікулы не распачаліся.

02. 07. 2008 г.
... Праспала, ну і добра! Не пайду. Добра, што можна пасля адпрацаваць.

07. 07. 2008 г.
Выхадныя скончыліся. Зноў гэтая нудная праца для ўліку... Адно цешыць душу – праклёны! Вось якія “скарбы”:

Каб у вас кішкі адцягнуліся!
* * *
Хай Пярун вас возьме!
* * *
Зрабі так, каб я цябе тры тыдні шукаў і не знайшоў!
* * *
Ідзі туды, адкуль не вяртаюцца!

... Як кажуць, проста і з густам. (Гродзенская вобласць, Шчучынскі раён.)

08. 07. 2008 г.
Як кажуць людзі:
Адчыні дзвер у сябе – у другіх адкрытай знойдзеш (прыказка).
Я сапраўды пачынаю цікавіцца, учытвацца ў творы! Дзіўна...

09. 07. 2008 г.
... Сярод гэтай парцы, сярод запісаў, класіфікацыі, вызначэння жанраў, падліку фальклорных адзінак... і так увесь дзень! Але паралельна з гэтым я раблю нататкі, выпісваю тыя творы, якія мяне зацікавілі. Вось некаторыя з іх:

Усе чэрці адной шэрсці (прыказка).

Ці вось такая даволі арыгінальная варыяцыя на тэму “рыбак-рыбака бачыць з воддалі”:

Чорт чорта пазнаў і на піва пазваў.

10. 07. 2008 г.
Доўга не магла класіфікаваць песню “Галя...” – аказалася маральна-этычнай баладай. Зацікавіла настолькі, што пачала шукаць іншую інфармацыю наконт гэтай песні. Знайшла няшмат: песня з украінскага фальклору, сустракаецца і ў фальклоры як беларускім, так і ў рускім... Самае дзіўнае, што я доўга не магла зразумець, адкуль памятаю ўрыўкі з тэксту. Аказалася, што Ул. Сарокін у сваім фільме “4” выкарыстаў гэтую маральна-этычную баладу... (а фільм, між іншым, я глядзела даволі даўно).

11. 07. 2008 г.
“Галя...” мяне праследуе! Дзіўная гэтая Гомельская вобласць...

14. 07. 2008 г.
Трапілася спецыфічная загадка:
На даным месцы крыжоў з 200. (Клубок нітак.)

Доўга адгадвалі ўсім “пакоем”. Думалі, што гэта могілкі, вышыўка на тканіне... і г. д. А ўсё так проста – клубок нітак!

15. 07. 2008 г.
...Працуем з гумарам – чытаем услых “перлы” не толькі ВНТ, але і збіральнікаў!..

16. 07. 2008 г.
... Дзіўная рэч: папкі з фальклорнымі творамі нібы самі выбіраюць да каго патрапіць. Ужо не першы дзень чытаю маральна-этычныя балады і любоўную лірыку. Суседцы ўжо некалькі разоў трапляліся замовы і праклёны, камусьці іншаму – армейскі фальклор і г. д.

17. 07. 2008 г.
Запомніліся пахавальныя абрады. Прыгожы рытуал...

Вось урывак з такога роду прозы (пахавальна-памінальная проза): “...апраналі ўсё новае...белае. Шылі самі: тканіну рвалі рукамі (не рэзалі); ніткі не адрывалі да канца (пакідалі “хвасты”)... Ногі і рукі звязвалі бінтамі. Нябожчыка прыкрывалі белай тканінай...” Пасля галашэнні, хаўтурныя песні...

18. 07. 2008 г.
Жартоўная песня ўпісалася ў кантэкст учарашняй пахавальна-памінальнай прозы:

“... На нагробіе напішыце: “Пакойнік водачку любіў”.
Цынічна...

21. 07. 2008 г.
Апошні дзень!
Дачакалася!

Малюнак студэнткi 5 курса спецыяльнасцi "беларуская фiлалогiя" Маргарыты Латышкевiч